العصبية القبلية واحد من السلوكيات الانسانية الطبيعية، الفكرة فيها ان الانسان بينتمي لمجموعة من البشر، بيكون جزء من المجتمع ده وبيدافع عنه زي العيلة سواء على حق او باطل، داخلين حرب معاهم، داخلين سلام معاهم، داخلين الحمام معاهم، الفكرة انه يحس انه جزء من كل، الفكرة ساعدت فى تطور الانسان خلال الكام الف سنة اللى فاتوا لان القبلية بتساعد انك تواجه الاخطار فى جماعة زي الحيوانات المفترسة، او الفياضانات او الزلازل، ده غير المنتجات الجانبية للقبلية زي ان كل القبيلة بتكون فى مكان واحد فده بيزود علاقات اجتماعية بين الاسر فى القبيلة، وبيزود التجارة و التخصص بين افراد القبيلة الواحدة.
النزعة القبلية ظهرت بأكتر من شكل على مر الزمن، بدأت بمجموعات البشر اللى عايشين فى مكان واحد، والموضوع اتطور مع الوقت للمجموعات اللى ليها ديانة واحدة، او اللى بيعملوا شغل واحد، الديناميكا اللى كان بتقوم عليها القبيلة ساعات مجرد ان الناس قاعدين فى مكان واحد، ساعات انهم بيتكلموا لغة واحدة او انهم بيشتغلوا شغل واحد، فتلاقى مثلا النظام الكنسي اللى بيسمح انك تعلن انتمائك لطائفة من الطوائف، او فى الاسلام مجموعة الشعائر والمعتقدرات اللى بتسمحلك تقول انك بتنتمي للطائفة دي عن غيرها، او تلاقي النقابات العمالية اللى بتجمع ناس بتشتغل نفس الشغل مع بعض تعملهم هدف ومكان لمناقشة اللى بيخص القبيلة دي، يمكن يكون شكل القبيلة اختلف مع الوقت لكن الفكرة واحدة، والتعصب واحد.
تطوير البرمجيات مش حاجة مميزة قوي، على الاقل من وجهة نظر سلوكية، النشاط بيعمله مجموعة من الافراد فبيتكون ليهم مجموعة من الافكار المختلفة عن المجموعات البشرية التانية فى المجتمع فبيبدأوا التجمع وتبادل الافكار وتنقيحها من خلال ديناميكيات المجتمعات وبتبدأ قوة الافكار تزيد وبيظهر التعصب القبلي فى الطريق بشكل طبيعي.
مجتمع مطورين البرمجيات مش جسد واحد، ده لأن نشاط تطوير البرمجيات من الانشطة اللى فى تحديث مستمر، المجال جديد نسبيا مقارنة بالطب او الهندسة المدنية مثلا، ده بيسمحله يتحرك بسرعة ويتطور اسرع، كل يوم بتظهر لغات برمجة جديدة او مكتبات واطر عمل جديدة او حتي تكنيك جديد، علشان كده المجتمع كله مشترك فى مجموعة من الافكار الدوجمائية، زي فكرة ان مطور البرمجيات مستوي ذكاؤه اعلي من المتوسط، او ان البرمجة من الانشطة اللى مش اي حد يقدر يعملها، وبعدين جسد المجتمع متقسم لأكتر من جزيرة، بيقسمه لغات البرمجة اللى كل مطور بيستخدمها، بيعتبر فيها المطور ان لغة البرمجة اللى اختارها من بين الاف لغات البرمجة هي الاختيار الامثل لانه حتي يغسل بيها الصحون، فاكر النهاردة انني شوفت فى الشغل مثلا مج مكتوب عليه “ممكن ابعت ايميل من امك لجدتك بلغة R”، معظم الديفلوبرز شايفين ده فى لغة البرمجة اللى اختاروها وبيشتغلوا بيها كل يوم، اللى هو ممكن يروح يغسل بيها الصحون عادي لانها بتنفع لكل حاجة يعني، بعدها بيظهر النزعة لمطورين بعينهم، فى مجتمع المطورين ربنا ابتلانا زي مجتمعات تانية بالمشاهير، ودول مجموعة من المطورين بيحبوا جدا يتكلموا، فيه منهم ناس بتتكلم اكتر ما بتبرمج، وبيحب يفتيلك جدا وجهة نظره فى ان التكنيك اللى بيعمله ده واللى سبحان الله ليه اسم كاتشي، هو احسن من اي تكنيك تاني ممكن تفكر فيه لوحدك، وبيبدأ يكتب مقال مطول عن اسبابه ودوافعه، ويتبعه بكتاب من o’reilly مع تالك فى مؤتمر او اتنين ومابينساش ابدأ يقولك انه كتب كتاب ماتنساش تشتريه بقي.
وده اسوأ نوع من انواع العصبية، الديفلوبرز بيتبعوا اي حد بيتكلم بصوت عالي وبيظهر فى مؤتمرات حتي لو مايعرفوش انجازاته، لكن مادام معاه ميكروفون يبقى مهم ورأيه صح، وقتها بيتحول المشهور من مجرد شخص بيقول رأيه، لنوع من المبشرين بدين جديد، بيظهرله اتباع وموالين، وبيتقسم المجتمع لناس متفقة فى الرأي و مجموعة معارضة، بتظهر المشكلة وقتها فى بيئة العمل لما اتنين واحد منهم متفق متشدد لرأي فلان و أخر معارض متشدد، الموضوع بيكون بيحطم الاعصاب خصوصا لو هم الاتنين شغالين على نفس المشروع، طيب هنمشي بأي رأي؟ نسأل شيخ بقى ولا إيه يا جماعة؟
الموضوع متكرر و ممل وبيبين قد ايه وجاهة النشاط اللى بتعمله مابتعمل اي فرق فى تفكير الشخص النقدي، كل الناس بتقع فى فخ “بس فلان كتب مقال بيقول فيه ان الTDD مات” أو “مين لسة بيستخدم روبي دي لغة ماتت من زمان”، او “ويندوز ايه اللى استخدمه على لابتوبي بس” مع انه مبرمج سى شارب مثلا.
رغم ان النزعة القبلية من السلوكيات الكريهة اللى البشر بيحاولوا يتخلصوا منها مفضلين الفردية عليها، لكن فى واحد من احدث واهم النشاطات فى عصر المعلومات النزعة القبلية لسة برضه مسيطرة وبتنتشر حتي بين القادمين الجدد للمجال.
التعلم من المقالات واكتشاف لغات جديدة وتقنيات للوصول للهدف شىء نبيل لكن العصبية للغة برمجة او مكتبة بعينها او منتجات شركة معينة، كل اللى بيعمله انه بيقلل اختياراتك لانك عملت لنفسك سور ماتقدرش تعديه، وبيعملك tunnel vision مابتقدر تشوف حواليها، ده غير المناقشات السفسطائية اللى ولا بتجيب ولا بتودي لانها مش مبنية على اسس منطقية ومابتخدش فى حسبانها ان لكل مقام مقال وكل مشكلة وليها حل وان معظم الحلول مش ابيض واسود لكنه درجة من درجات الرمادي بين اكتر من تكنيك، فليه تختار اللون الغامق او الفاتح لما ممكن تمزجهم علشان يناسبوا اللى بتعمله.