الناس كلها كانت فرحانة بصفقة الاستحواذ اللى اتفقت عليها الشركة من كام يوم، كنا عاملين احتفال كبير فى الدور الأرضى، الستارتاب كانت بتعاني بقالها فترة من خساير كتير وبنحرق فلوس كل كوارتر لكن الحمد لله اخيرا ربنا فرجها من عنده، سمعت عن الصفقة بقالى كتير لكن ماعرفتش تفاصيل ولا الاستحواذ هيكون على الشركة كلها ولا على الشركة والفريق مع بعض، فى الحالتين احنا الكسبانين.
حوالى خمسميت بنى ادم نازلين من الادوار المختلفة للدور الأرضى وخارجين برة المبني فى مكان الاحتفال، كان كل الناس هناك، حتى مؤسسين الشركة ومديريها، اتجمعنا علشان مؤسس الشركة يعلن عن صفقة الاستحواذ وعلى وشه ابتسامة عريضة من الودن للودن، رفع كوباية العصير فى ايديه وضرب بمعلقة جنبها علشان يسكت الناس، وبعد الهدوء بدأ بصوت عالى يعلن:
“احنا بقالنا 5 سنين من اول تمويل لينا بنعافر ونكافح علشان نوصل للعملاء ونرضيهم، علشان ناخد نسبة من الماركت من المنافسين، تعبنا كتير وعملنا كل اللى نقدر عليه، كفريق، كل واحد فينا سبب فى النجاح اللى وصلنا ليه، سبب فى الصفقة دي واقناع المستحوذين بمستقبل شركتنا” سكت ثواني وكمل:
“انتوا الشركة، المبني والمنتج مايساويش حاجة من غيركوا، انتوا روح الشركة دي، قلبها النابض وحياتها، وانا بشكر كل واحد فيكوا لتضحيته حرفيا بجزء من حياته علشان الشركة، علشان نحقق حلمنا”، ساب الكوباية من ايديه على الترابيزة وضم كفيه
“اعتقد جيه الوقت اللى نقابل فيه كياننا الأم، ونكمل صفقة الاستحواذ دي، كانت صفقة صعبة جدا علينا انا وسمير الكو فاوندر، بس قدرنا واصرينا، فى الأخر مش حاجة سهلة بيع ارواحنا للشيطان”
بصينا لبعض باستغراب، وهمست للى جنبي “هو بيقول ايه؟” بصلى ومط شفايفه بمعنى “مش عارف”، بصيت لمؤسس الشركة تاني كان رافع ايديه وباصص للسماء كأنه بيدعي، وفى نفس الوقت اهتزت الأرض تحتنا واتشققت وظهرت ذراع طويلة زي الأخطبوط سوداء من زاوية المكان طولت لحد ما بقيت اعلى من المبني حواليها على الأرض فتحة نار الجحيم واضحة منها وحرارتها بدأت تضرب وشى، الناس بدأت تتحرك وتجري، تهرب وهرج ومرج، بصيت وانا بجرى على الذراع مرة تانية وكان بيظهر اذرع تانية من كل جهة حوالين المبني اطرافها باينة من خلف المبني، بتتحرك وتتلوي وتلف وتمسك المبنى، الفتحة اللى خرج منها الذراع بدأ الشقوق حواليها تزيد وتوسع والناس تقع فيها، ويخرج منها شياطين الجحيم وتستحوذ على الناس، محاسبين ومحاميين ومبرمجين ومصممين، كل واحد منهم بقى جزء من صفقة الاستحواذ، الشيطان جاى ناحيتي وانا واقع على الارض ومش مصدق عيني، استحوذني وسمعت افكاري، او افكاره قبل ما اغيب عن العالم “اننا نجحنا، حافظنا على الشركة وعلى مستقبلها، عانينا كتير لكن اخيرا تعبنا جيه بفايدة وبقيت شركتنا الستارتاب جزء من كيان كبير، فى الجحيم”